Kashmir chungchanga inbiakna nei tura sawmna hnawl

Pakistan sorkarin Kashmir chungchanga inbiakna nei tura India sorkar a sawmna chu sorkar laipui chuan a hnawl a, Kashmir chungchang ni loin, firfiaka chetna thleng ṭhin chungchangah chauh inbiakna an neihpui thei tih a sawi.

Pakistan Foreign Secretary Aizaz Ahmad Chaudhry chuan Kashmir chungchangah foreign-secretary level talk nei tura a sawmna chu chhangin, Foreign Secretary S Jaishankar chuan Islamabad-ah chuan ramri kaltlanga firfiakte chetna thleng thin leh a kaihhnawih thila inbiakna nei tura a kal theih tur thu a sawi.

Sorkar laipui chuan Jammu and Kashmir chungchanga Pakistan inrawlh chu a pawm lo a, he state hi India ram a ni a, Pakistan chuan inrawlh turin dikna a nei lo a ni, a ti.

S Jaishankar chuan Pakistan nena inlaichinna ṭha leh nghet zawk neih tuma India-in a beihna chu Pakistan sorkar chetdan chuan a lo dang fo niin a sawi bawk.

Hetihlai hian Pakistan Prime Minister Nawaz Sharif-a chuan khawvel chuan Kashmir mipuite thil duh an ngaihven a ngai a ni tiin, zalenna duha an beihna chu a thlawp zel tur thu a sawi. Sharif hian Pakistani-occupied Kashmir (PoK) president kalchhuak, Sardar Muhammad Yaqoob Khan pawh a lo hmu tawh a ni.