Amnesty India-in a office-te a khar

Amnesty International India chuan sorkar laka hel tura midangte fuiha puhna thubuai siamsak a nih hnuin, a office-te a khar lailawk a, awareness programme buatsaih a tumte pawh a ṭhulh rih.

Amnesty India hian Bengaluru-ah Kashmir-a mihring dikna chanvo palzut a nih dan chungchang sawihonaa a buatsaih a, he huna tel mi ṭhenkhat chu India dodal zawnga aua puh an nih avangin Amnesty lakah hian inhuatna chawk tho thei zawnga thil tiah puhin thubuai ziah luh a ni.

Police hnena complaint thehluttu hi BJP hnuaia right wing student organisation, Akhil Bharatiya Vidyarthi Parishad-te an ni a, Bengaluru-a seminar neihnaah hian Kashmir independence duh thute aupui an ni tih an sawi.

Amnesty International India thupuangtu, Himanshi Matta chuan, "Complaint thehluha an thusawite hi thu belhchian dawl lo vek a ni. He inkawmhona hi mi tupawh tel theiha hawn a ni a, staff member-te chu hetianga aurualnaah pawh hian an tel lo a ni" a ti. Jammu and Kashmir-ah mi tam tak dikna chanvo palzut sak niin, heng mite tana rorelna dik a awm theihna atan seminar pawh chu an buatsaih tih a sawi bawk.

Bengaluru leh Delhi-ah right-wing activist-ten lungawi lohna an lantir avangin an office-te hi khar rih an tum ta tih Matta chuan a sawi. Bengaluru-a seminar an buatsaih ang hi Mumbai leh New Delhi-ah pawh buatsaih an tum a, mahse an staff-te himna an ngaihtuah avangin he programme pawh hi an ṭhulh rih a ni.