Karnataka-ah bawng phurtu sawisa hlum

Karnataka state-ah Vishwa Hindu Parishad (VHP) leh Bajrang Dal activist-te chuan BJP worker, Praveen Poojary chu a motor-ah bawng pahnih a phurh vangin an sawisa hlum.

Udupi SP KP Balakrishna chuan Praveen Poojary kuthlaknaa inhnamhnawih mi 17-te chu man an ni tawh tih a sawi a, "Poojary hian a motor-ah bawng pahnih a phur a, Karkala district-a Hebri hmunah an lo bei a ni" a ti.

Motor-ah hian Poojary ṭhian, Akshay Devadiga pawh a chuang a, a ni pawh hian hliam na tak a tuar a ni.

Ramchhung hmun hrang hrangah bawng humhalhtu intiten pawikhawihna an thlen fo a, tual pawh a that fo tawh a ni. Thla hmasa khan Gujarat-ah Dalit mite chu bawng thi vun an lip avangin bawng humhalhtu intite chuan na takin kut an lo thlak bawk. He thil thleng hi hmun hrang hrangah duh lohna lantir a ni hnuin, Prime Minister Narendra Modi pawhin bawng humhalh tih hming chhala pawikhawihna thlen ṭhinte chu a dem thu a lo sawichhuak tawh a ni.

Hetihlai hian Nilani khan civil society group chuan Supreme Court-ah bawng talh khapna dan siam chu sut turin an ngen a, he dan siam hian miin a ei tur duhzawng thlang tura dikna chanvo a neihte a palzut a ni, an ti. Court-a ngenna thehluttu zingah hian Dalit activist-te pawh an tel.

India ram hi khawvela bawngsa ei nasatna ber leh thawnchhuak tam ber dawttu ram a ni. Mahse Hindu-te tan bawng hi ransa thianghlim leh an serh a nih avangin BJP thawhpui pawl hrang hrangte chuan bawngtalh hi an dodal a ni. Kum 2014-a central-a sorkarna an siam aṭang khan BJP party leh a thawhpui pawl hrang hrangte chuan bawng humhalh leh bawngsa khap chungchang hi an thar thawh leh a ni.