J&K-ah silai mu lem mtd 1.3 hmang tawh

Jammu and Kashmir-a tualchhung buaina thleng mekah, mipui thinrim pungkhawmte hnawhdarhna atan paramilitary force-te chuan ni 32 chhungin silai mu lem, pellet maktaduai 1.3 an kapchhuak hman niin an sawi.

He thu hi CRFP chuan Jammu and Kashmir High Court-ah Ningani khan a hriattir a ni.

Security force-ten silai mu lem an kah≠chhuah vangin mi 400 chuangin an mitah hliam an tuar a, an zinga eng emaw zat chu an mit a del phah dawn nia sawi a ni. Hei vang hian silai mu lem hman khap tura ngenna hi High Court-ah thehluh a ni. He petition thehluh a chhannah, CRPF chuan mipuite thunun an harsat avangin Standard Operating Procedure (SOP) chu hman a harsa hle niin a sawi.

CRPF-ten mipui lungawi lo pungkhawmte thunun leh hnawh darhna atana silai mu lem an hmang hi party leh right body hrang hrangte chuan an sawisel fo a ni. CRFP chuan silai mu lem hi kum 2010
aṭang khan mipui buaina siama pungkhawm≠te thununna atan hman ṭan a nih thu an sawi a, hei hi hman chhunzawm phal a nih loh chuan sipaite chuan buaina nasat zualna hmunah chuan silai tak an hman mai a ngai dawn a, thihna pawh a thlen tam phah zawk an hlauhthawn thu High Court an hrilh.

Mipuite thunun hian hmanraw hlauhawm lo zawk, Oleoresin grenade, pepper ball, stun grenade leh electric shell-te pawh an hmang ṭhin niin CRFP chuan a sawi. Inspector General chuan kumin July 8 aṭanga August 11 thleng khan teargas shell 8,650 leh plastic pellet 2,671 an hmang tawh bawk tih a sawi. Heng hmanruate hi an kahchhuah pawhin mihring kawng hnuai lam chinah kah hram an tum a, mahse buaina nasat zualna hmunah chuan duh ang taka chet a har ṭhin a ni,a ti.

Kashmir Valley-ah chuan nimin thleng khan hmun ṭhenkhatah curfew puan chhunzawm a la ni a, inlakhran duhtu pawlte chuan nawrh an huaihawt chu August 25 thleng atan an pawtsei bawk.

Anantnag, Magam khua leh Srinagar khawchhung hmun ṭhenkhatah chuan curfew hi puan chhunzawm a ni a, hmun dangah pawh punkhawm a la ni bawk. July 9 aṭanga Kashmir Valley-a tualchhung buaina chhuak vanga thi hi mi 67 an tling tawh a ni.

Tualchhung buaina thlen hnu hian sorkar hnathawk tam tak chu office an kal ṭha lo hle. Sorkar chuan sorkar hnathawkte chu curfew puanna hmunah pawh an identity card chu curfew pass atana hmang a, office kal vek turin hrilh mah se hnathawka chhuak an tlem hle a, hei vang hian sorkar chuan khauh zawka hma lak a tum. State sorkar chuan sorkar hnathawkte chu office an kal lo a nih chuan August thla aṭang hian an hlawh a hrensak dawn tih a sawi.

Kashmir Reader chanchinbuin a tarlan danin, Srinagar-a sorkar department 50 zingah July thla chhung khan department 20 chuangah chuan hnathawka kal 30% chauh an awm a, higher education department chu kal chhe berin, 10% chauhin office an kal a ni. Attendace data-a a lan danin, civil secretariat-a hnathawk mi 2,600 zingah mi 400 chauhin July thla chhung khan office an kal bawk.