AAP MP video tihchhuah chhuitu hun pek belh

Aam Aadmi Party (AAP) MP Bhagwant Mann-a'n Parliament House chhung video internet lama a tihchhuah avanga a chungthu chungchang ngaihtuahtu, Lok Sabha panel chu November thla thleng hun pekbelh an ni.

Committee on Conduct of Bhagwant Mann chairman, Kirit Somaiya chuan Speaker Sumitra Mahajan chuan hun a pekbelh tih nimin khan a sawi.

Tun thla tir khan panel hi report thehluh turin kar hnih hun pawhsei sak an lo ni tawh bawk. Kar hmasa khan panel hian AAP MP-in high security zone a luh laia video-a lakna hmuna duty, security mi leh sate chu thu an lo zawtfiah tawh a ni. MP Mann-a'n Parliament building a luh lai hian venhimna lamah fel tawk lo a awm em tih thlengin chhui chian a ni.

AAP MP thiltih dan hi Parliament House complex security palzutna lian tak a nih avangin thil thlen dante chhui chiang tur hian member pakua awmna committee hi din a ni. Party hrang hrang MP-te pawhin Parliament House chhung awmdan leh venhimna kalpui a nih dante social media lama a tihdarh avangin AAP MP hi na takin an sawisel a, a chunga action la turin Speaker hi an phut. Speaker chuan Mann hi a chungthu ngaihtuah fel a nih hma chuan House rorelnaa tel tawh lo turin a hrem a ni.