Kashmir-ah all-party team tirh phut

Janata Dal (United) chuan Kashmir Valley buaina thleng mek chungchang enfiah leh a chinfel dan ngaihtuah turin Prime Minister Narendra Modi-a kaihhruaiin all-party team tirh a rawt.

Kar kalta Inrinni khan Jammu and Kashmir-a epty party hrang hrang aiawhte chuan President Pranab Mukherjee hmuin, an state chhung dinhmunte an sawipui a ni. Eptu pawl aiawhte hi J&K Chief Minister hlui Omar Abdullah-aín a ho a ni. Hemi hnu hian JD(U) thupuangtu, KC Tyagi chuan PM a theih loh pawhin Home Minister kaihhruai all-party team chu Kashmir-ah tir a, political party hrang hrang hruaitute be tura a duh thu a sawi.

Tyagi chuan Kashmir Valley-a buaina thleng chuan ni 44 zet awh tawh hnuah pawh sorkar laipui a la che chhuak lo chu pawi a tih thu a sawi a, boruak siamṭhat dan kawng zawnga Prime Minister emaw, Home Minister emaw kaihhruai, party hrang hrang aiawhte telna team chu tirh a ngai tawh a ni, a ti. Kashmir-a lungawi lohna lantirtute leh security force-te pawh boruak ṭha a awm theih nana dawhthei taka awm tura a duh thu a sawi bawk.

President Mukherjee an hmuh hnua chanchin thar lakhawmtute a kawmnaah, Omar Abdullah chuan President hnenah hian memorandum an thehluh thu a sawi a, an state-a buaina thleng mek chu Kashmir Valley-ah chauh ni loin, Pir Punjal, Chenal Valley leh Kargil lamah pawh a darh zel tih a sawi. State chhung buaina thleng meka sorkar laipui leh state sorkar chet lak danah an lungawi tawk lo hle tih a sawi.

Nimin khan Kashmir-a Tangdhar sector-a Line of Control-ah security force-ten Pakistan aṭanga India rama rawn luh tum firfiakte lo dangin, firfiak pathum an kap≠hlum. Heng firfiakte hi August 19-a BSF post beihnaa inhnamhnawihte niin army official chuan a sawi. BSF post an beih ṭum hian sipai pathumin hliam an tuar. Official chuan firfiakte an kahhlumna hmunah hian an silaite pawh an hmu niin a sawi.