RBI Governor thar atan Urjit Patel ruat

Reserve Bank of India (RBI)-a deputy Governor nilai, Urjit Patel chu RBI Governor thar atan kar kalta Inrinni khan ruat a ni a, Raghuram Rajan a thlak ang. Deputy Governor zinga Governor atana ruat pariatna a ni a, RBI Governor 24-na tur a ni.

Kum 52 mi, Patel-a hian RBI Governor hna hi September 4 aṭangin kum thum chhung a chelh dawn a ni. A thlak tur, kum 53 mi Rajan hi kum 50 a nihin RBI Governor atan ruat a ni a, he hna chelh thei naupang ber a ni.

RBI Governor thar tur, Urjit Patel hi kum 1990-1995 inkar khan International Monetary Fund (IMF) ah a thawk a, hemi chhung hian US, India, Bahamas leh Myanmar-ah te a awm. Kum 1996-1997 khan deputation-in RBI-ah hian a awm a, 1998-2001 khan Ministry of Finance-ah consultant a ni.