Eptuten Rajya Sabha inkhawm boycott tum
Eptu party-te chuan Rajya Sabha-a eptu member pariatte suspend-na tihtawp bakah, an thil phut dang pathumte tihhlawhtlin a nih loh chuan Rajya Sabha rorel inkhawm chu boycott an tum thu an sawi.
Congress leader Ghulam Nabi Azad chuan an thil phut chungchang hi nimin khan a puang a ni. Mimal sumdawng lianten loneitute thlai thar chhuah chu sorkarin minimum support price (MSP) a bihthliah aia hniama an leisak lohna tura bill siam tur te, MSP chu MS Swaminathan committee report in rawtna a siam behchhan siam leh, Food Corporation of India emaw sorkar emaw chuan loneitu buh leh thlai tharchhuah te chu MSP in leisak an ni ngei tih a tichiang ṭhin tur a ni, an ti.
Pathiannia Rajya Sabha-a sawisel hlawh tak farm bill chungchang sawihonaah eptu MP pariatte chu he bill duh lohna an lantirnaa an chet dan a mawi loh avangin suspend an ni. Bill pass a nih dawn hian eptu lam chuan an duh lohna lantirin dawhkan chungah te an lawn a, microphone-te an tichhe tel bawk. Deputy chairman Harivansh chu farm bill hi hmanhmawh taka pass a nih theihna tura sorkar puiah an puh a, democracy kalphung pawh zawm loin select committee ten an lo zirchian hmasak tur pawhin thawn a ni lo, an ti. Hei bakah hian sawihona hun pawh pawtsei duh loin, chawpchilh takin Pathianni khan pass nghal a nih thu an sawi. Hei vang hian Rajya Sabha deputy chairman lakah hian no-confidence motion an pu lut a, mahse chairman Venkaiah Naidu chuan Thawhṭanni khan he motion hi a hnawlsak a ni.
MP pariat suspend-te hian Parliament kawtah nimin thleng khan farm bill duh lohna hi an la lantir chhunzawm zel. RS deputy chairman Harivansh chu nimin khan MP-te awmna hmunah hian kalin, thingpui in puia titi pui a tum a, mahse MP nuarte hian loneitute hmakhua ngai lotu tiin a sawmna hi an lo hnar a ni. National Congress Party (NCP) president Sharad Pawar chaun eptu MP-te chunga RS deputy chairman chet dan mawi lo leh, farm bill chungchanga an ngaihdante sawi a remtih sak lo avanga lungawi lohna lantirin nimin khan chaw a nghei. Pawar chuan RS Deputy Chairman rorel dan chu a dem thu leh, House chhunga thil thlen dan chu a hmain an la hriat ngai loh thu a sawi. Prime Minister Modi kaihhruai sorkar chuan House-a eptute chu engmah ti thei loa nawr beh a tum a ni, a ti.