PM-in CM pasarihte meeting neihpui dawn

Prime minister Narendra Modi chuan vawiin hian ram chhunga hri leng hluarna state/UT chief minister leh health minister-te chu virtual meeting a neihpui dawn a, Covid-19 leng dona kawnga an hmalak dante leh inbuatsaih dante a sawipui ang. 

Vawiina meeting a neihpui turte hi Maharashtra, Andhra Pradesh, Karnataka, Uttar Pradesh, Tamil Nadu, Delhi leh Punjab-te an ni. Heng state/UT pasariha hri kai awm zat hi ram puma hri kai mek zinga 63% chuang an ni. Hri kai hmuh chhuah tawh zingah 65.5% leh hri thihpui zinga 77% chu heng state amite an ni bawk. 

Maharashtra, Punjab leh Delhi-ah chuan hri thihpui, Case Fatality Rate (CFR) hi 2.0% chuang an ni a, positivity rate pawh rampum rate 8.52 % aiin a sang  bawk. Sorkar laipui chuan hri leng dona kawngah state/ UT sorkarte chu theih ang angin a thawhpui a, healthcare leh medical infrastracture thuam chakna kawngah pawh a pui ṭhin. Hri leng hluarna state/ UT-ahte sorkar hmalakna enpui turin multi-disciplinary team tirh an ni fo bawk a ni.