Irani-i college degree chungchang ngaihtuah dawn

Delhi Court chuan Human Resources Development (HRD) minister Smriti Iran-i college degree neih dan chhui chian phuta complain thehluh chu a pawm a, August 28 hian a ngaihtuah ang.

Minister Irani laka thubuai hi freelance writer Ahmer Khan-a thehluh a ni. Iran hian inthlan dawna Election Commission hnena affidavit a thehluhah, a college degree neih kum chu inang loin a ziak a ni, a ti.

Irani hi Prime Minister Narendra Modi-a cabinet member zinga naupang ber a ni. Complain thehluttu Ahmed chuan, "Lehkha a thiam leh thiam loh chu buaina tur a ni lo. Mahse Human Resources Development Minister ni chunga thu dik tawk lo a sawi zel hi a ṭha lo a ni," a ti.

Kum 2004, April thla khan Irani hian nomination paper a thehluhah, kum 1996-ah Delhi University aṭangin correspondence program hnuaiah BA a zo tiin a sawi. Mahse nikuma Uttar Pradesh-a Amethi bial inthlan a chuhna turah khan, School of Open Learning, Delhi University aṭangin kum 1994 khan B.Com a zo tiin a tarlang thung.

Minister-in a college degree neih kum inang loa a thehluh danah hian thil dik tawk lo a awm ngei a ni tiin, petition thehluttu Khan chuan Representation of the People Act hnuaiah dan a bawhchhiat avanga hrem ngei a phut thu a sawi.

Hetihlai hian law degree leh BSc degree lem siama puh, Delhi Law Minister hlui Jitender Singh Tomar-a'n bail a dilna chu hnawlsak a nih hnuin, judicial custody-ah ni 14 dang awm tura tih a ni. Additional Chief Metropolitan Magistrate (ACMM) Tarun Yogesh chuan Tomar hi July 6 thleng judicial custody-ah dah a nih thu sawiin, document leh affidavit-te chu a lem siam mai tur a ni lo tiin a zilh.

Tomar hi Uttar Pradesh aṭanga BSc degree leh Bihar aṭanga Law degree lem neiah puh a nih avangin a lakah complain thehluh a ni a, June 9 khan man a ni.