China-in UN-ah Lakhvi a hum

Kum 2008, November 26-a Pakistan firfiakte'n Mumbai khawpui an beihna a ruahmantu ber nia puh, Pakistan firfiak pawl, Lashkar-e-Taiba hotu Zaki-ur-Rhman Lakhvi laka action lak tumna chu China in a lo dang.

26/11-a Mumbai khaw­pui beihnaah hian mi 166 an thi a ni. He pawi­khawih tura a bul­tum­tu leh ruahmantu bera puh, Lakhvi hi Pakistan thuneitute chuan man mah se, kumin April thla khan an chhuah zalen leh a ni.

Tun thla tir lam khan India ngenna angin New York-ah UN Sanctions Committee neih a ni a, Lakhvi chhuah zalen a nih chungchangah Pakistan chu insawifiah turin a phut a ni. Mahse hei hi China chuan lo dangin, a thil phut tihlawhtling tur chuan India hian information a pe chiang tawk lo tih a sawi.

Kum 55 mi, Lakhvi hi kum 2008 December thla khan man a ni. Midang parukte nen thubuai hi samsak a ni a, mahse kum nga chhungin a thubuai ngaihtuahnaah hmasawnna a awm lo a, hei hian India leh Pakistan inkar boruak pawh a tihchhiat phah a ni.

China-in Lakhvi a hum danah sorkar laipui pawh a lawm lo a, Prime Minister Narendra Modi pawhin an lungawi loh thu hi kar hmasaa India rama rawn zin, Chinese senior official, National Peo­ple's Congress-a Stan­ding Committee chair­man Zhang Dejiang pawh a lo hrilh tawh a ni.