Yoga dodal chu Pakistan-ah kal rawh se: VHP hruaitu

Vishwa Hindu Pari­shad (VHP) hruaitu, Sadhvi Prachi-i chuan Yoga dodaltute chu Pa­kis­­tan-ah kal mai rawh se tiin, India rama awm turin dikna an nei lo a ni, a ti.

All India Muslim Per­sonal Law Board's (AIMPLB) te'n yoga an duh loh thu an sawi avangin a chhan letna atan VHP hotu hian he thu hi Thawh­lehni khan a sawi.

Sadhvi hian Rajpath-a International Yoga Day lawmna pui ber hman­naa Vice President Hamid Ansari tel lo chu a sawi zui bawk. Vice Pre­sident office chuan sorkar lamin Ansari hi a sawm loh vanga tel lo a nih thu a sawi a, hei pawh hi chhang letin Sadhvi chuan, "Yoga Day hman chu politician fate innneihna ang a ni lo a, sawmna dawn kher a ngai lo," a ti.

Hemi hma hian BJP MP Yogi Adityanath chuan sorkarin school-a zirtir a tum, ni (sun) chibai bukna (Surya namaskar) sawiseltute chu na takin a lo bei let tawh bawk a, "Surya namaskar duh lo chu tuipuiah tlahlum vek rawh se," a lo ti tawh bawk.

Congress Party chuan VHP hotu thusawi hi an sawisel nghal. Congress thupuangtu Sanjay Jha chuan, "Democracy ramah chuan mi tu pawh­in yoga chu practice emaw, practice duh lo emaw turin dikna chanvo an nei vek a ni," a ti.

BJP chuan insawifiah tumin, VHP hi political party a nei lo a, social level-ah pawh agenda hran nei a nih thu sawiin, an party ngaihdan a ni kher lo tih a sawi.