July 21-ah Parliament monsoon session

Parliament monsoon session chu July 21 aṭangin neih a ni dawn a, kar thum a awh ang.

Cabinet Committee on Parliamentary Affairs (CCPA) chuan session neih hun tur hi a sawi a, dan pangngaiah chuan monsoon session hi kar li neih a ni ṭhin. Mahse kum­inah chuan kar thuma neih tura rawt a ni. Session lo awm turah hian eptute chuan Indian Premier Lea­gue chairman hlui, Lalit Modi-a chungchanga buai­na, 'Lalitgate' vangin na taka sorkar an beih rin a ni.

Session ṭan hun atan a tirah July 20 rawt a ni a, mahse July 18 emaw 19-ah Eid festival neih a nih dawn avangin 21-a ṭan tura rel a ni.

Tun ṭum Parliament fur ṭhutkhawm hi a boruak a ṭan hle rin a ni. Eptute chuan dan bawhchhetu, Lalit Modi-a puihnaa BJP hruaitute inhnamhnawih dan leh, Land acquisition ordinance chungchang an sawichhuah ngei rin a ni. Congress party chuan Lalit Modi-a ṭanpuitu, BJP hruaitu hlun pahnih- External Affairs Minister Sushma Swaraj leh Rajasthan Chief Minister Vasundhara Raje-te chu ban an nih loh chuan session boruak hi a ṭha lo mai thei tiin a lo sawi lawk tawh bawk. Rajya Sabha-a eptu hruaitu Ghulam Nabi Azad chuan eptute thil phut hi tihpuitlin a nih loh chuan session neih tur hi rorel mumal theih loha a awm a hlauhthawn thu a sawi.

Hetihlai hian BJP chuan an hruaitu pahnihte thlavang hi a hauhsak thung a, eptute'n bang tur an phutna pawh a hnawlsak a ni.