Ni khatah Covid-19 kai dama puan nuai chuang awm
India ramah hripui lengin ziaawm lam pan hleithei lo mah se enkawl dam pawh an pung chak hle. Nimina sorkar report tihchhuahah chuan hri kai dam leh nuai chuang an awm a, hei hi ni khata dama puan tam ber record a ni hial.
Ramchhung hmun hrang hrangah Covid-19 kai nuai 55 chuang an awm tawh thung a, heng zinga nuai 44 chuang chu enkawl dam tawh niin mi nuai kua chuangin hri an la kai a, thihpui sing kua dawn an awm tawh bawk.
Hmuh chhuah thar aiin dama puan an tam
Nimina Ministry of Health and Family Welfare report tihchhuahah chuan Thawhṭanni khan hri kai hmuh chhuah thar mi 75,083 an awm laiin dama puan mi 1,01,468 lai an awm thung. Mi 1,053-in an thihpui leh bawk.
Sorkarin nimina report a tihchhuah thleng hian hri kai enkawl dam mi 55,62,663 an awm tawh a, dama puan mi 44,97,867 awm tawhin mi 88,935-in an thihpui thung. Hri kai mek 9,75,861 an la awm a ni.
India dinhmun
India ramah hian enkawl dam rate a sang tawh hle a, 80.86 % a ni tawh. Hri kai mek rate chu 17.54%-ah tlahniam tawhin thihpui rate chu 1.60% a ni bawk. Sorkar chuan 'Test, Track and Treat' kalphung an kalpui vangin enkawl dam rate hi a sang niin an tarlang a, nimina enkawl dam zat hi record a nih mai bakah ni khata nuai chuang dama puan hi a thlen vawi khatna a ni.
Enkawl dam tam hle mah se August aṭang khan India hi ni khata hri kai thar tamna ber ram a ni char char a, September thla chhunga hri kai hmuh chhuah thar tawh zat chawhrual chu sing kual vel a ni hial.
Hri kai tam ber Maharashtra-ah chuan hri kai 12,24,380 an awm tawh a, nuai 9 chuang dam tawhin sing thum chuangin an thihpui thung a, mi 2,75,017-in hri an la kai mek.
Lashadweep-ah nimin thleng khan Covid-19 hri kai an la awm lo a, Mizoram chu India ram State/UT zinga hri vanga thi la awm lohna awmchhun a la ni.
Rampum sample test report
Indian Council of Medical Research (ICMR) chuan nimina report an tihchhuahah darkar 24 chhungin sample 9,33,185 an endik leh tih an tarlang a, hri len ṭan tirh aṭanga nimina report an tihchhuah thleng hian sample 6,53,25,779 an endik tawh. Sample endikna tura laboratory pawmpui 1,777 an nei tawh a, heng zinga 1,062 chu sorkar laboratory niin 715 chu private laboratory a ni thung.