PM-in khawpui tihchangtlunna tur scheme a hawng

Prime Minister Narendra Modi chuan nimin khan khawpui tihchangtlunna tur scheme pathum- Smart Cities Mission, Atal Mission for Rejuvenation and Urban Transformation (AMRUT) leh Housing for All chu New Delhi-ah a hawng.

Scheme thar pathum hawnin a tum ber chu India ram khawpui hrang hrangte tihchangtlun leh changkang zawka din a ni. Scheme pathumte hi Pradhan Mantri Awas Yojana (PMAY) tia vuah an ni a, an pathum hlut lam hi cheng vaibelchhe nuai li a ni. PMAY hian khawpuia chenna in nei lote in leh lo dinsak a tum a ni.

AMRUT hnuaiah hian khawpui chhunga hmasawnna ruhrel changkang leh thianghlim zawkte siam tum a ni.

PM Modi chuan Smart Cities Mission hnuaiah hian khawpui thlanchhuah bik 100-ah infrastructure ṭha leh changtlung zawk pek a, mipuite tana nunphung ṭha zawk, environment thianghlim leh service ṭha tak siam tum a ni, a ti. Khawpui 500-ah kawng hrang hranga hmasawnna thlentir a, smart city-ah siam tum a nih thu a sawi bawk.

Ramchhunga chenna in nei indaih lohna a la nasa hle tih sawiin, PM chuan kum 2022-ah India-in zalenna a hmuh kum 75 naah chuan, chenna in indaihlohna, vaibelchhe hnih chu din fel vek tum a ni, a ti. "Mitinte tana chenna tur in pek hi kan mawhphurhna a ni" a ti.

PM hian smart city leh scheme dang kalpuina tura kaihhruaina leh logo te pawh a tlangzarh nghal a ni.

AMRUT project atan hian khawpui lian, mi nuai khat chuang chenna chin khawpui 500-te thlan an ni dawn a, smart city scheme atan hian competition hmangin khawpui 100 thlan an ni bawk ang. Khawpu 100 thlanchhuahna turah hian sorkar laipui leh state sorkar te chuan duhsak bik an nei dawn lo tih a sawi.

Scheme thar hawnna inkhawmah hian Union Minister for Urban Development Venkaiah Naidu, Minister of State for Urban Development Babul Supriyo, Maharshtra Chief Minister Devendra Fadnavis, Haryana Chief Minister Manohar Lal Khattar, J&K Deputy Chief Minister Nirmal Kumar Singh te an tel.

Scheme kalpui dan turah vawiin leh naktuk hian workshop buatsaih zui a ni dawn a, he hunah hian mayor, municipal hotu, state tina a buaipuitu minister leh chief secretary-te an tel ang.