Nepal ṭanpuina atan US dollar tld 1 pe dawn

Lirnghing rapthlak tak tuartu, Nepal ram ṭanpuina atan sor­kar laipuiin dollar tlukleh­dingawn khat a pe dawn.

Nepal ram khawpui, Kathmandu-ah Interna­tional Donors Conclave hmannaah External Affairs Minister Sushma Swaraj-i chuan Nepal ṭanpuina pek a nih tur thu hi a sawi. Ṭanpuina sum pek tur hi lirnghingin thil a tihchhiatte siam leh din tharna atana hman a ni ang.

Minister Sushma Swa­raj-i chuan Nepal ram chu puih an ngaihnaah theih­tawpa puih zel an tum tih a sawi a, hemi chung­changah hian Ne­pal Prime Minister Su­shil Koirala pawh a be tawh bawk.

International Confe­rence on Nepal Recon­struction hi Nepal sorkar huaihawt a ni a, April 25-a an rama lirnghing na takin thil tam tak a tihchhiatte din ṭharna tura sum tuakna atana buatsaih a ni. Lirnghing vang hian mi 9,000 dawnin nun­na an chan a, mi dang tam takin hliam an tuar bawk. Conference-ah hian ram 35 aiawh an tel a, an zingah hian China, Norway, Bhutan, Bang­ladesh leh Sri Lanka-te pawh an tel.

China leh Japan chuan Nepal ram ṭan­pui­na tur hian dollar tlukleh­dingawn khat an pek tur thu an sawi bawk. China Foreign Minister Wang Yi chuan Nepal ṭanpui nan dollar maktaduai 750 an pek bakah, nakkumah mi 1,500 te tan training an buatsaih dawn tih a sawi.

Japan pawhin Nepal ram puihna turin dollar maktaduai 120 a pek tur thu a puang bawk a, lirnghingin cultural heri­tage a tihchhiatte siam­ṭhatna kawngah puih a tum bawk. Norway pawh­in Nepal ṭanpuina atan hian dol­lar makta­duai 30 a pe dawn tih a puang bawk.