Raje-i chungchangah BJP ngaihdan a phir

Eiruknaa inhnamhnawiha puh leh dan kalha chet vanga hmingchhiatna nei mek, Indian Premier League (IPL) chairman hlui Lalit Modi a ṭanpui avangin Rajasthan Chief Minister leh BP hruaitu, Vasundhara Raje chu bang turin eptute'n an nawr chhunzawm zel.

Hetihlai hian CM Raje-i chung­changah hian BJP chhung­ah ngaihdan a phir. Ṭhen­khat chuan an party-in a hmingchhiat phah nia ngaiin ban mai an duh a, ṭhen­khat chuan ban a nih chuan hruaitu dang, Lalit Modi-a chung­changa inhnamhnawiha puhte bang tura phut zel a nih dawn avangin action lak an duh lo thung.

Nimin khan Raje-i hian Jaipur-ah state cabinet minister leh a thawhpui hnai tak, Rajen­dra Rathore a hmu a, Delhi-ah party hotu lute hmuh a tum bawk.

Vasundhara Raje chuan Lalit Modi a puih thu hi a zep lo a, Modi-a tana a ngensaknaa hming ziak pawh ama ziah ngei tih a sawi. He document copy hi Congress party chuan mipui hmuhah an tlangzarh a ni. Congress party hruaitu, Sachin Pilot chuan BJP chuan Vasundhraja Raje hi bang turin an ngen ngei tur a ni, a ti. Raje-i chuan dan a bawhchhia tih BJP chuan a pawm a ngai a ni tiin, a laka action an lak loh chuan President hnenah thlengin an zualko dawn tih a sawi bawk.

Rajasthan CM hi ban a nih loh chuan Congress party chuan state pumah nawrh huaihawt a tum tih sawiin, Pilot chuan, "Prime Minister-in eirukna leh hlemhletna do zel a tumna chu khawiah nge a awm tak?" a ti.