Pawngsual thubuaiah UP Congress MP man

Uttar Pradesh Congress MP, Sitapur-a cheng Rakesh Rathore chu nimin, Ningani khan pawngsual kaihhnawih thubuaiah man a ni. Rathore hi Kotwali Nagar police-in man tura a chenna in an pan lai hian thuthar lakhawm tute a kawm lai niin, police hnenah amah a in pe nghal a ni.

Man a nih hnuah Rathore hian Allahabad High Court-ah bail a dil a, mahse a dilna hi hnawl sak a ni thung. Rathore hian,"High Court hian court hniam zawka in lan hma in karhnih chhung hun min pe a, mahse keima thuin police hnenah hian ka in pe a ni. Court hian ka chungah dikna a lantir ngei dawn tih hi ka hre chiang a ni" tiin an man chungchang hi a sawi.

UP police-te hian mipat hmeichhiat rawngkaia chhaih nawmnahah hmeichhe pakhatin a puh avangin January 17 khan Rathore lakah hian thubuai an ziak lut a ni. Hmeichhe hnenah hian kum li chhung nupui a nei tura intiam angin a in sawi a ni. Hmeichhia thubuai thehluttu hian police hnenah hian phone call kimchang leh in biakna record te a thehlut tel bawk.

Hmeichhe pasal hian January 22 vek khan thubuai dang thehlut lehin, hetah hian Rathore leh a fapa chuan thubuaite hnukkir turin an nawrlui niin a chhal. Hemi avang leh MP lam ṭangten hmeichhe nihna an tarlan bawk avang hian Sitapur police ten midang panga lakah BNS Act hnuaia section 67 tlawhchhanin thubuai hi an ziahluh belh leh a ni.