Rajasthan CM-in midangte an ban chuan ban a inhuam
Rajasthan Chief Minister, Vasundhara Raje-i chuan dan bawhchhetu, Lalit Modi-a puih avanga bang tura an nawrnaah midang inhnamhnawihte an ban tel dawn chuan ban a huam thu a sawi.
BJP hruaitu Vasundhara Raje-i hian Ningani khan New Delhi-ah BJP hruaitu lute a hmu a, hetah hian Lalit Modi-a chungchanga inhnamhnawih party hruaitu dangte an inhuam chuan a ni pawh Rajasthan CM aṭanga a ban tur thu a sawi.
Sorkarin a passport a tihtawp sak chunga Lalit Modi-a'n British thuneitute hnena travel document a dilnaah, Raje-i bakah External Affairs Minister Sushma Swaraj-i te chuan an pui a ni.
Sushma Swaraj chuan Lalit Modi a puih thu hi a pha lo a, a nupui cancer vei mek chu Portugal-a zai a nih dawn avangin khawngaihna vanga thuneitute hnena a sawipui thu a tarlang. Mahse hei hi eptu lam chuan a pawm lo a, Swaraj-i pasal leh a fanu hi Lalit Modi-a'n court-ah a aiawha a hman avangin khawngaihna lam ni loin, duhsakna lantir a tumna a ni, an ti.
BJP chuan an hruaitu pahnih, Lalit Modi chungchanga hmingchhiatna nei mekte hi an thlavang a la hauhsak chhunzawm zel. Hei bakah hian Sushma leh Raje-i chungchangah hian tun thlengin Prime Minister Narendra Modi chu a la ṭawngchhuak lo bawk.
Congress party chuan kum 2011-a Lalit Modi-a'n British immigration hnena dilna a thehluha amah ṭanpuina tura Raje-in lehkha a lo pekte pawh an pho lang tawh a, Rajasthan CM hi bang turin an nawr chhunzawm reng a ni.