1965 war champha 50-na lawm tum

Prime Minister Naren­dra Modi-a kaihhruai NDA sorkar chuan kum 1965-a India leh Pakistan indo champha vawi 50-na chu pui taka lawm a tum.

Sorkar chuan India-Pakistan war laia ram tana nunna hlantu sipai­te hriatrengna atan a lawmna hi thla khat chhung neih tum a ni, a ti. Indo ṭanni, August 28 aṭangin lawmna hi ṭan a ni dawn a, Republic Day tenau anga hmangin Raj­path-ah parade te neih a ni ang. Indonaah hian India chuan Haji Pir pass a la, mahse tunah chuan he ram hi Kashmir-a Pa­kistan rorelna bial chhungah a awm tawh a ni.

Kum 1965-a indonaah hian India chuan hnehna changin insawi mah se, indona hi United Nations kaihhruaina hnuaiah kum 1965, September 23 khan inkahhai puanga tihtawp a ni a, hei vang hian hnehtu zawk hi chiang taka sawi theih a ni lo tiin mi ṭhenkhat chuan an sawi thung. Ram pahnihte hian indonaa hnehtu zawk niin an inchhal ve ve a, mahse UN a rawn inrawlh a, Taskhent decla­ration siam anih lai khan India chu a dinhmun a chungnung zawk nia sawi a ni.

Modi-a kaihhruai NDA sorkar chuan 1965 war-a India hnehna chan lawm a ni dawn tih a sawi. September 20-ah Rajpath-ah parade huaihawt a ni ang a, hetah hian sipaite'n an thiam thilte lantirin, air show pawh neih tum a ni bawk.

Sorkar chuan Burkee, Khemkaran, Asal Uttar, Phillora, Parbhat Ali, Bhuj Monbao leh Dograi-ah indo hnehna lawmna hun buatsaih a tum bawk.