NSUI-in Irani ban phutin nawrh a huaihawt AAP-in man nghal turin a phut

Congress students' wing, Na­tional Students Union of India (NSUI) chuan Human Resources Deve­lopment Minister, Smriti Irani chu dik lo taka a educational qualification tarlangah puhin, bang tura phutin nawrh an huaihawt.

NSUI chuan India ram education minister berin a education degree chungchanga thil dik tawk loa a ti chu pawi an tih thu leh, minister a nihna aṭanga bang nghal tura an phut thu a sawi.

Delhi Youth Congress President Amit Malik chuan Delhi sorkarin education degree lem siamtu, Jitender Singh Tomar chu law minister aṭanga a ban nghal ang khan, sorkar laipui pawhin Irani hi a ban ve nghal tur a ni, a ti. Tomar hi BSc degree leh law degree lem siama puh a nih avangin man a ni a, judicial custody-ah dah mek a ni.

Delhi-a rorel lai, Aam Aadmi Party (AAP) pawhin nimin khan sorkar laipui hnenah thil dik lo a tih avangin Education minister Irani hi man turin a phut. AAP chuan Irani man tur hian sorkar laipui chu hun a pe a, hemi chhunga man a nih loh chuan rampum huapa nawrh huaihawt a tum.

AAP chuan eiruknaa inhnam­hnawih leh dan bawhchhiaa puh, Lalit Modi-a ṭanpuitu, BJP hruaitu pahnih Rajasthan Chief Minister Vasundhara Raje leh External Affairs Minister Sushma Swaraj-i te pawh ban turin sorkar laipui a phut bawk. Party hruaitu Ashutosh chuan, "NDA sorkar hi dik lo taka thil titu ban tur hian darkar 72 hun kan pe a ni. Smriti Irani hi vawiinah an man kan beisei a, mahse man a la ni lo. Ni thum chhunga a laka action lak a nih loh chuan, AAP hian rampum huapin lungawi lohna a lantir ang," a ti.

Sorkara dinhmun pawimawh tak tak chelhtu, thil dik lo taka tia puhna an awm lai reng a Prime Minister a ngawi tlat chu an dem hle tih Ashutosh chuan a sawi bawk. "PM a ṭawngchhuak duh lo hian hruaitu hmasate nena danglamna a neih loh zia a lantir a ni," tiin, Narendra Modi chu Rashtriya Swayamsevak Sangh (RSS) thunun tlat leh ama thua engmah ti thei loah a puh bawk.

Nilaini khan Delhi court chuan Education Minister-in a educational qualification a thehluhnaa thil fel tawk lo a awm tia complain thehluh chu a lo pawmsak tawh a, hemi chungchang hi August 28-ah ngaithuah a ni ang.