India ramah hri kai mek nuai 10 chuang awm Sample Vbc 6 chuang endik tawh

Ministry of Health and Family Welfare-in nimina report an tihchhuahah hri kai hmuh chhuah thar 97k chuang an awm leh a, hri vanga thi 83k aia tam awm tawhin, hri kai mek nuai 10 chuang an awm mek a, enkawl dam tawh nuai 40 chuang an awm bawk.

Maharashtra chu state hrang hrang zinga hri kai tam berna nih chhunzawm zelin hri kai an tam fal tawh hle nghe nghe a, Andhra Pradesh leh Tamil Nadu-te chu Maharashtra tih loha hri kai tamna state an ni.

Nimina sorkarin report a tihchhuahah chuan Nilaini khan hri kai hmuh chhuah thar 97,894 lai an awm leh a, ni hnih chhung a zawnin hri kai hmuh chhuah thar 90k chuang an awm leh ta a ni. Nimina sorkar report-a hri kai hmuh chhuah thar zat hi ni khata hri kai hmuh chhuah tam ber record a ni leh tawh bawk. India ramah hian hri kai hmuh chhuah 51,18,253 lai an awm tawh.

Darkar 24 chhungin mi 82,719 lai dama puan an nih laiin 1,132 chuan an thihpui leh bawk. Nimina report an tihchhuah thleng hian India ramah hri kai dam leh mi 40,25,079 chhinchhiah an ni tawh a, 83,198-in thihpui tawhin 10,09,976-in hri an la kai mek. Hri kai mek zat hi nimin khan nuai 10 a tling chiah a ni.

India ram hi khawvela hri kai tam ber dawttu ram an ni mek a, hri kai tam ber ram USA aiin nuai 17 velin hri kai an tlem zawk.

Enkawl dam tawh rate hi 78.64% a ni a, hri kai mek rate chu 19.73% niin thihpui rate chu 1.63% a ni thung.

Indian Council of Medical Research (ICMR) chuan nimina report an tihchhuahah Nilaini khan sample 11,36,613 lai an endik leh tih an tarlang a, hri len ṭantirh aṭanga nimina report an tihchhuah thleng hian sample 6,05,65,728 endik a ni tawh.

Sample endikna tura laboratory pawmpui 1,751 an nei tawh a, chung zinga 1,059 chu sorkar laboratory niin 692 chu private laboratory a ni thung.

India ram state/UT zinga hri kai tamna ber Maharashtra-ah chuan nimin khan hri kai hmuh chhuah thar mi 23,365 an awm leh tih tarlan niin hri kai 11,21,221 an awm tawh. Maha-ah hian mi 7,92,832 chu an dam leh tawh a, 2,97,506 chuan hri la kai mekin mi 30,883-in an thihpui tawh bawk.

Andhra Pradesh leh Tamil Nadu-ah hri kai nuai 5 chuang an awm tawh a, hri kai nuai chuang awmna state/ UT 15 a awm tawh a ni.