Russia-in India hnenah Sputnik V dose mtd 100 hralh phal

Russia chuan Covid-19 vaccine a siam, Sputnik V dose maktaduai 100 chu India hnenah hralh a remti.

Sputnik-V chungchangah hian a hmain Russian Direct Investment Fund (RDIF) leh Indian manufacturer-te chuan inremna an lo siam tawh a, he inremnaah hian dose mtd 300 siam chhuah tum a ni. 

Hemi hnu Nilaini khan Russia sovereign wealth fund hian Sputnik V dose ṭhahnem tham tak hi Indian drug (pharmaceutical) company Dr Reddy`s Laboratory tan hman a remti zui ve ta bawk a ni. 

Dr Reddy`s Laboratory-ah hian clinical trial phase 3 neih a ni dawn a, hemi chungchangah hian RDIF chuan pawmpuina nghah mek a nih thu a tarlang. Sputnik V hi phase 3-a trial neih zawh a nih hmain Russia chuan a pawm fel tawh a, hei vang khan sawisel a hlawh phah hle.

August 26 aṭang khan Russia hian phase 3 trial hi a nei ṭan a, he trial-ah hian mi 40,000 chuang volunteer an awm a ni. 

Dr Reddy`s Laboratory-a co-chairman G V Prasad chuan Sputnik V hian clinical trial-a phase 1 leh 2 a paltlang tawh chu a rintlak hle tih a sawi. Clinic-a trial neih zawh a nih hunah, a him ṭhat chuan zawrh chhuah tum a ni a, a man zat tur erawh India leh Russia hian an la tarlang lo.