Lalit Modi chungchangah ṭawngchhuak turin PM phut

Congress Party chuan Prime Minister Narendra Modi chu tunlaia thawm nei lian tak, BJP hruaituten dan bawhchhetu, Lalit Modi an puih chungchangah ṭawngchhuak tawh turin an phut.

Eiruknaa inhnamhnawih leh dan bawh­chhiaa puh, Lalit Modi-a passport hi Congress kaihhruai UPA sorkar khan a passport a tihtawp sak a ni. Hemi hnu hian a awmna London aṭanga zinchhuak thei tura travel document a dilnaah hian BJP hruaitu pahnih, NDA sorkara External Affairs Minister Sushma Swaraj-i leh Rajasthan Chief Minister Vasundhara Raje-i chuan an ṭanpui tih hriatchhuah a ni.

Dan bawhchhetu an puih avang hian eptute chuan union minister leh Rajasthan CM-te hi bang turin an nawr reng a, hetihlai hian BJP chuan an hruaitu pahnihte hi a chhan thung. BJP hruaitu pahnihte chungchangah rorellai party leh eptu party-te an inchhal reng lai hian Prime Minister Modi chuan engmah a la sawichhuak ve lo.

PM hian nimin khan thla tina radio-a program a hman ṭhin, 'Mann Ki Baat' a hmang leh a,hetah hian a kaihhruai sorkar hnathawh hrang hrangte a fak a, mahse a minister-te hmingchhiatna leh buaina neihte erawh a sawilang lo. Hei vang hian Congress party chuan na takin a sawisel zui nghal a ni. Swaraj leh Raje-i chungchangah PM chuan a ngaihdan chiang taka a sawichhuah a hun tawh a ni, an ti.

'Maan Ki Baat' program-ah PM hian tunhnaia Yoga Day hlawhtling taka hman a nih avangin mipuite hnenah lawmthu a sawi a, a hlawhtlin theihna tura Ayush Ministry hmalakna chu lawmawm a tih thu a sawi bawk. India ramah chauh ni lo, khawvel ram hrang hranga Yoga Day hman a ni a, ram dangte chu India ram hriatchian chak tirna a neihtir phah a ni, a ti. 'Ram dangte lakah kan culture hi kan chhuangin kan hrilh hriat zel a ngai a ni' a ti.

Sorkar laipuiin social security scheme thar pathum a siamte chu hmang ṭangkai turin mipute a chah a, he scheme hi reiloteah ramchhung mi vaibelchhe 10 velin an chhawr thei nghal dawn a ni, tiin PM chuan a sawi.

PM chuan ramchhung district 100-ah mipa leh hmeichhia inthlauhna sang chak lutuk, hmeichhia punna tlahniam zel chu a vei thu a sawichhuak. A bikin Haryana-ah hei hi a tam bik niin a sawi a, social media kaltlanga hmeichhe naupangte humhalhna tur kalpui a ngaih thu a sawi. Nausen hmeichhiate humhalhna kawng khat atan Haryana-a Bibipur khuaa an Sarpanch-in 'Selfie with daughter' campaign an kalpui chu ṭha a tih thu sawiin, PM chuan he hmalakna an thlawpna lantirna atan pa ho chu an fanu-te 'selfie' pui a, a hnena thawn turin a ngen. Thlalak a dawn zinga ṭha a tih zualte chu a twitter-ah a lo dahlang leh dawn a ni.