AAP-in High Court-ah thubuai a thehlut

Delhi-a Aam Aadmi Party (AAP) sorkar chuan Lieutenant Governor-an Anti-Corruption Branch(ACB) hotu atana Delhi Police Joint Commissioner atana MK Meena a ruat chungchangah Delhi High Court-ah thubuai a thehlut.

Delhi sorkar hian ACB hotu atan hian a hmain SS Yadav a lo ruat tawh a ni. Mahse sorkarin Yadav a ruat hnuah, LG hian Meena hi a hrana ruatin Yadav hi a luahlan tir a ni. Delhi sorkar chuan LG thiltih dan hi dan bawhchhiatna a ni tiin, sut tir a tum a, Vigilance Department kaltlangin Meena hi a hna ngai zawm turin a ti bawk. Mahse LG hian a thupek hi a sut duh loh bakah, Meena hian a hna thar hi a zawm tawh avangin sorkar thupek hi a zawm duh lo a, a nawr lui a nih chuan sorkar khin a tum thu a sawi bawk.

LG hian ACB hotu thar tur hi June 9 khan a ruat a, Meena-an a hna a zawm thar hnu hian thubuai pakhat pawh an la ziak lut lo niin AAP chuan a sawi.

Hetihlai hian AAP-in ACB hotu atana a ruat, Yadav chuan a dinhmun a him loa a ngaih thu leh, Meena hian a nawr nasat thu a sawi. Meena hian thuneitute remtihnate loa CRPF mi a kawl thu a sawi bawk.

AAP sorkar hian a vawi khatna atan kar kalta Zirtawpni khan Assembly inkhawmah kum 2015-16 atana state budget a pharh. AAP budget pharh hmasa berah hian kumin kumtawp hma ngeia khawpui chhunga college hrang hrang leh thingtlangah te a thlawna Wi-fi facility pekchhuah an tiam.

Budget pharhtu, Deputy Chief Minister Manish Sisodia chuan , college leh khawpui chheh vela thingtlang khuaa wi-fi pekchhuahna tur atan hian cheng vaibelchhe 50 ruahman a ni thu a sawi. 'Ruahman dan chuan kumin kumtawpah mipuite hman theih turin a thlawna wi-fi pek chhuahna, a thawh khatna hi tihfel hman tum a ni. Sorkar website-te pawh a thlawn vek a ni ang a, eng hunah pawh en theih vek tura dah a ni ang, a ti.

Deputy CM Sisodia chuan zirna lama hmasawnna an ngaih pawimawh tur thu a sawi. Delhi chu sikl centre-a siam an tum a, hmeichhiate himna an ngaih pawimawh thu leh, hmeichhe hostel paruk sak a nih tur thu a sawi. Hostel sak tharah hian CCTV camera pawh dah vek tum a ni, a ti.

Delhi khawpu chhunga bus zawng zawngah CCTV camera vuah vek an tum tih budget pharhtu, Sisodia chuan a sawi.

Kum 2015-16 chhunga Delhi sorkar sum hman tura ruahman hi cheng vaibelchhe 41,129 a ni a, heng zinga hian plan sum cheng vaibelchhe 19,000 a tel. Delhi-a Municipal Corporation pathum tan an hnathawhna turin cheng vaibelchhe 5,908 dah a ni bawk.