Lalit Modi leh Raje-te'n sorkar thil an hmingin an dah: Congress

Congress party chuan BJP hruaitu, Rajasthan Chief Minister Vasundhara Raje leh Indian Premier League (IPL) chairmn hlui Lalit Modi chu sorkar thil an mimal hminga dahah a puh.

Modi leh Raje-te hian sorkar property, Dholpur Palace chu an mimal hminga dah a, luxury hotel-ah siam an tum tiin Congress chuan a sawi a, a finfiahna tur document pawh an nei tih a sawi.

Congress hruaitu Jairam Ramesh chuan, "Dan bawhchhetu tlanchhe mek, Lalit Modi leh Vasundhara Raje-te hi sumdawnna lama inkawp an ni. Thudik pahnihna chu Lalit Modi hian Mauritius aṭangin cheng vaibelchhe 21 a dawng a, hei hi Raje-i fapa, Dushyant Singh-a company-ah a invest a ni. A pathumna chu Raje-i hian UK thuneitute hnenah Lalit Modi-a thil dilnaah a hming a sign bawk a ni. Heng dawt pathumte hi BJP leh Raje-te chuan thupbo an tum a, mahse kan haichhuak a ni," a ti.

Dawt pathumte an haichhuah hnuah, a pali-na an haichhuah leh thu sawiin, Congress chuan Lalit Modi leh Vasundhara Raje-te'n sorkar property an mimal hminga an dahna document a neih thu a sawi. Ramesh chuan, "Kum 1954 khan Dholpur Riyasat chu Union-ah inchhung lutin, kum 1977-ah Dholpur Palace chu sorkar ramah dah a ni. Mahse sorkar property a ni chung hian Raje leh Modi-te hian private luxury hotel-a siam tumin an la kalpui a ni," tiin a sawi.