BJP minister 4 ban phutin AAP-in kawngzawh
Aam Aadmi Party (AAP) worker-te chuan central-a rorellai, BJP minister pali, kawng hrang hranga hmingchhiatna neite chu bang tura phutin nimin khan kawng an zawh.
AAP member-te hi Delhi-a Jantar Mantar-ah chawhma dar 10 khan an kalkhawm a, hmingchhiatna nei mek External Affairs Minister Sushma Swaraj, Human Resource Minister Smriti Irani, Rajasthan Chief Minister Vasundhara Raje leh Maharashtra Rural Development Minister Pankaja Munde-te laka action la turin BJP an phut.
Jantar Mantar aṭang hian Parliament panin kawng an zawh a, security force-te'n lo dangin buaina tenau a chhuak a ni.
AAP chuan Election Commission hnena a educational qualification dik lo a pek avangin HRD Minister Irani-i chu bang turin an phut. Dan bawchhia leh eirua puh, IPL hotu hlui Lalit Modi-a ṭanpuitu, Sushma Swaraj-i leh Rajasthan CM Raje-i bakah, cheng vaibelchhe 226 tihchingpenna inhnamhnawiha puh, Maharashtra Miniser Pankaja Munke-i te chu ban an phut bawk.
Nawrh huaihawtte chuan BJP hian an party hruaitu hmingchhiatna nei mekte lakah action a la duh lo tih sawiin, hemi chungchangah insawifiah turin BJP President Amit Shah an phut. Hei bakah hian PM Narendra Modi-a'n a minister-te chungchanga engmah a sawichhuak duh lo chu an dem thu an sawi a,ṭawngchhuak turin an phut bawk.