Tihar Jail aṭangin mi pahnih an tlanchhuak

India ram tan-in zinga venhimna khauh ber nia sawi, Tihar Jail aṭangin kar kalta Inrinni zan khan mi pahnih an tlanchhuak.

Tang pahnihte hi lei verh aṭangin an tlanchhuak a, pakhat zawk Faizan chu man ni tawhin, Javed erawh zawn mek a ni.

Ministry of Home Af­fairs (MHA) chuan jail thu­­nei­tute hnenah report theh­lut turin a hriattir nghal bawk.

Delhi Lieutenant Gene­ral Najeeb Jung chuan jail aṭanga tang pahnih an tlan­chhuah danah magis­te­rial inquiry nei turin Dis­trict Ma­gistrate (South West) Ankur Garg a hriattir a, kar khat chhungin report a theh­lut ang.

Tihar Jail DIG Mukesh Prasad chuan, "June 27 zan khan ward number 4-a awm tang pahnihte chu an tlan­chhuak a ni. Pakhat zawk hi kan man tawh a, a thurualpui pawh zawn mek a ni," a ti.

Mi pahnihte hi rukruk vanga tang an ni a, kar kalta Inrinni zan khan an tanna bang aṭanga lei an verhah an tlanchhuak a ni. An awm lo tih hi Pathianni zana roll an call-ah hriatchhuah chauh a ni.

Tihar Jail-ah hian ven­himna thuah thuma dah a ni a, tang mek zingah hian politican lar tak tak an awm. Delhi law minister hlui Jitender Singh Tomar pawh a tang mek a ni.