Advani-a'n dikna vawng nung turin sorkar a duh

Central-a rorellai, BJP hruaitu hlun LK Advani chuan Prime Minis­ter Narendra Modi-a kaih­hruai sorkar chu mipuite laka dikna leh zahawmna vawng nung zel tura a duh thu a sawi.

External Affairs Mi­nis­ter, BJP hruaitu pawi­mawh Sushma Swaraj-i leh BJP hruaitu dang, Rajasthan Chief Mi­nis­ter Vasundhara Raje-i te'n dan bawh­chhetu, Lalit Modi an ṭanpui chu eptu pawlte'n sorkar laipui beihna atan an hmang mek. Hetihlai hian PM Modi hi Lalit Modi-a chungchangah engmah a la ṭawngchhuak duh lo a ni.

Advani chuan, "Mi­puite'n inthlanah an aiawh turin min thlang chhuak a ni. Hei vang hian mipuite laka rinawmna chu thil pawimawh ber a ni," a ti.

Kum 1996 khan Hawala scam-a inhnam­hnawih­a puh a nih avang­in Advani hi MP a nihna aṭangin a bang a, mahse he buainaah a inhnam­hnawih lohzia finfiah a nih hnuah kum 1998 khan Parliament member atan thlan nawn leh a ni.

Mipuite'n politician-te laka rinna an nghah ngamna chu politician tana mawhphurhna pawimawh tak a ni tih sawiin, Advani chuan mipuite hmunah dikna leh zahawmnate an vawn nun zel a ngai a ni, a ti.

Swaraj leh Raje-i te buaina chungchang erawh a sawilang duh lo a, thutlukna siamtu tur a nih loh avangin sawibelh tur a neih loh thu a sawi.