
Maha Kumbh chungchang vangin Parliament-ah in au buai
Parliament budget session chu nimin khan chhunzawm a ni a, tun hnaia Maha Kumbh-a innekbuaina thleng chungchang avangin Parliament in hnihah member-te an in au buai nasa hle.
Lok Sabha-ah session ṭan a nih veleh eptu MP-te chuan Congress kaihhruaiin Maha Kumbh-a chhiatna thleng chungchang sawi ho phutin an au buai nghal. House laiah chhuak khawmin, eptute hian lungawi lohna an lantir zui a ni. Lok Sabha-a Congress deputy leader, Saurav Gogoi leh Congress general secretary KC Venugopal kaihhruaiin, eptu member-te hian Question House tih tawp a, mi eng emaw zat thihna thlenna innekbuaina thleng chungchang sawi ho an phut. Hei bakah he innekbuaina thite hming kimchang puanzar an phut bawk.
Speaker Om Birla chuan eptute hi President thusawi chungchang sawi hona, motion of thanks debate neihnaah an thil sawi duhte hi sawi zawk tur leh, rorel inkhawm ti buai lo zawnga thil ti turin a ti. Eptu member-te hi Question Hour hmannaah pawh awm tluan duh loin House aṭangin an chhuak a, mahse a hnuah an rawn let leh tho a ni.
Rajya Sabha-ah pawh eptu member-ten Maha Kumbh-a innekbuaina thleng leh, ruahmanna fel fai lo tak chungchang sawi ho an phut bawk. Chairman Jagdeep Dhankar-a'n sawi hona hun a siam duh loh avangin eptute hi House aṭangin an chhuak tau zui a ni. House aṭanga chhuak zingah hian Congress, SP, DMK, AAP, RJD, CPI leh CPM MP-te an tel.
Uttar Pradesh-a Prayagraj hmunah January 29, 2025 khan Maha Kumbh hmanga pungkhawmte zingah innekbuaina nasa tak thlengin, mi 30 an thi a, hliam tuar 60 an awm bawk.