
Delhi Assembly inthlan neih turah venhimna ti khauh dawn
Delhi Assembly inthlan chu February 5, 2025 hian neih a ni dawn a, venhimna pawh tih khauh niin inthlan vuakvetah paramilitary force company 220, home guard 19,000 leh Delhi Police 35,626 te an duty dawn.
Assembly inthlan neih tur atan hian party hrang hrangte pawh an campaign ngawrh hle a, nimin Thawhṭanni tlai dar 5 khan campaign theih hun hi a tawp a ni.
Kumina India khawpui, Delhi-a rorel tur thlannaah hian party pathum - rorellai Aam Aadmi Party(AAP), Congress leh BJP te chu thuneihna chelh tumina an inbei dawn. Campaign tawp ni hian BJP chuan hmun 22-ah road show an buatsaih.
Election Commission(EC) in a tarlan danin, Delhi-ah hian vote nei mi vbc 1.56 an awm. An zingah mi nuai 83.76 chu mipa niin, hmeichhia nuai 72.36 bakah third-gender 1,267 an awm.
Vote thlakna tur polling station 13,766 siam niin, pianphunga rualban lote tan hmun 733-ah vote thlakna tur siam a ni bawk. Theme based model polling station atan station 210 siam a ni bawk ang. Constituency tinah polling station pakhat ṭheuh chu hmeichhe hlangin an enkawl dawn a, polling station dang 70 pawh rualban loten enkawlin, vote nei tharte hipna turin ṭhalai mit la zawng station te pawh siam a ni dawn bawk.
Kum 85 leh a chung lamte bakah, rualban lote chu in lamah vote an thlak phalsak an ni ang. An zinga mi 7,552 chuan in lama vote thlak an duh zawk thu an sawi tawh.
Tun ṭum Delhi inthlanah hian Queue Management System(QMS) application chu a vawikhatna atan hman a ni dawn. He application hmang hian vote thlak tur ten polling station-a mi an tam leh tam loh an hre thei dawn a ni.