J&K-a eptu party aiawhten PM an hmu

Jammu and Kashmir Chief Minister hlui, Omar Abdullah kaihhruainain Kashmir-a eptu pawl aiawhte chuan nimin khan Prime Minister Narendra Modi an hmu a, Kashmir Valley-a buaina thleng mek chungchang an sawipui.

Eptu pawl aiawhte hian mipui nawrh huaihawtte hnawhdarhna atana sipaiten silai mu lem, pellet an hman ṭhin chu khap turin PM hi an ngen. Sipaite silai mu lem kahchhuah avang hian mi tam takin an mitah hliam an tuar a, mitdel phah tur pawh eng emaw zat an awm.

PM Modi-a hmutute hi an hruaitu, Omar Abdullah hoin mi pariat an ni a, ni 40 chuang zet Kashmir Valley-a buaina thlengin mipuite tana harsatna a thlen hrang hrangte an sawi. Tualchhung buaina chhuak vang hian mi 67 an thi tawh a ni.

Eptu aiawhte chuan PM hnena memorandum an thehluh≠ah, sorkar laipui chuan an state buaina chingfel tura rang taka hma a lak a, buaina thleng mek chu inbiakna hmanga chinfel tura a chet chhuah thuai an beisei thu an tarlang.

Sipaiten nawrh huaihawtte laka silai mu lem an hman ṭhin chuan mi tam tak mitdelna a thlen phah avangin khap nghal tura an duh thu an sawi. Hetihlai hian sipaite chuan mipuite thunun nana silai mu lem an hman chu a him tawk niin an sawi thung a, hei hi khap a nih chuan silai mu tak te an kahchhuah a ngai dawn a, hei hian chhiatna nasa zawk a thlen thei a ni, an ti.

J&K eptu pawl aiawhte hi sorkar laipuia thuneitute dawr tur hian Inrinni khan Delhi an thleng a, President Pranab Mukherjee leh Congress vice president Rahul Gandhi-te pawh an hmu tawh a ni.