Top Ramen noodles lak kir a ni ve leh

Mihring hriselna atana him tawk lo nia sawi a nih avangin Nestle India siam, Maggi noodles chu an pekchhuahna dawr aṭangin lakkir a ni tawh a, hemi hnu hian Nissin Foods pawhin an thilsiam Top Ramen noodles pawh a lakir ve leh dawn ta.

Indo Nissin Foods chuan Indian food regulator, Food Safety & Standards Authority of India (FSSAI) aṭangin an thilsiam chungchangah pawmpuina an hmuh mai loh avangin Top Ramen hi an lakir dawn tih a sawi.

Top Ramen hi Maggi leh Sunfeast Yippee dawtah, ram chhunga instant noodles lar ber a ni. India ramah kum sawmhnih chuang zet zawrhchhuah a ni tawh a, kum 1991 aṭang khan licence an nei tih an sawi.

Mahse kum 2012 kumtawp lam khan FSSAI chuan product approval pekna atan kaihhruaina thar a siam a, hemi hnuaiah hian Indo Nissin chuan pawmpuina hi dilin, hei hi tun thlengin FSSAI hian a la tihfel sak lo.

Indo Nissin Foods Pvt Ltd Managing Director Gautam Sharma chuan FSSAI hian approval an dil chu a la tikhawtlai a, hetihlai hian approval pek an nih hma chuan an noodle siam hi lakir tura an ngen avangin an lakir rih dawn tih a sawi. FSSAI-in June 8-a ramchhunga instant noodle siamte test vek tura a tih hnu khan an thil siamte uluk taka an test thu leh, a result pawh FSSAI hnenah hian an thehluh thu a sawi.

Nestle India siam, Maggi noodles-ah hian danin a phal chin bak lead hmuh a nih avang leh, a tihtuina atan hmehhan telh a ni bawk tihhmuhchhuah a nih avangin state tam takah zawrhchhuah khap a ni a, company pawhin a pekchhuah tawhte a lakir leh a ni. Nestle chuan Maggi noodle a lakkir, cheng vaibelchhe 320 hu vel chu a tichhe tawh a ni. Hemi hnu hian Hindustan Unilever pawhin FSSAI pawmpuina a la hmuh loh avangin Knorr instant noodles a siam chu a la kir ve leh bawk.