Vote nuai 1.5 chuangin Jaya-i a chak

Tamil Nadu-a Radha Krishnan Nagar assembly biala by-election result chu nimin khan puan a ni a, Tamil Nadu Chief Minister, AIADMK candidate J Jayalalithaa-i chu vote nuai 1.5 chuangin a chak.

Jayalalithaa hian amah hnaih bertu, CPI candidate C Mahendran aiin vote 1,51,252 in a hmu tam zawk. Mahendran hian vote 9,690 chauh a hmu pha a, candidate dangte chuan an dahkham an chawi vek a ni. RK Nagar bialah hian vote nei mi 245,000 vel an awm.

Result puan a nih hnuah Jaya-i chuan Radha Krishnan Nagar bial mipuite hnenah lawmthu a hrilh a, hneh taka thlan tlin a ni chu kum 2016 assembly inthlan an neih tura an party dinhmun lantir lawkna a ni, a ti. Mipuite'n a laka an beiseinate tihlawhtling turin theihtawp a chhuah dawn tih a sawi.