PM Modi-a'n Kejriwal a hmu duh lo: AAP

Aam Aadmi Party (AAP) chuan Prime Minister Narendra Modi-in AAP hotu leh Delhi Chief Minister Arvind Kejriwal a hmu duh lo tiin a sawi.

Arvind Kejriwal-a adviser Nagendra Sharma chuan, "Kar hmasa khan Chief Minister hian PM hi hmuh a tum a, mahse PM hian tihtur dang a nei tih min lo hrilh a ni. CM hian Finance Minister Arun Jaitley emaw, Home Minister Rajnath Singh emaw a hmu thei zawk ang tiin min lo hrilh a ni," a ti.

Kejriwal hian ni 10 liamtaah khan PM Modi hnenah thil pawimawh tak panga sawipui tur a nei tiin inhmuh a lo dil tawh a ni. AAP chuan Delhi sorkar leh Delhi Lieu­tenant Governor Najeeb Jung inkara thu­neihna inchuh avanga harsatna awm mek te leh thil dang pawimawh sawi a tum tiin a tarlang.

AAP hruaitu chuan, "PM hian thil dang ti turin hun a nei reng thei a, selfie la tur pawhin hun a nei. Mahse Delhi CM hmu tur erawh chuan hun a nei lo a ni," a ti. PM a hmuh theih tak loh vangin Kejriwal hian Home Minister Rajnath Singh a hmu ta tih a sawi.

Hetihlai hian LG Jung-a'n anti-corruption branch hotu atana MK Meena a ruat chungchanga Delhi sorkar zualkona chu Delhi High Court chuan a hnawlsak. Delhi sorkar chuan a hmain ACB hotu atan hian SS Yadav a lo ruat tawh a ni. Mahse court chuan Delhi sorkarin Meena hna zawm tur lo dang tura a ngenna chu hnawlin, Yadav chu Meena hnena in report turin a ti ta zawk a ni.

Kejriwal hian Delhi sorkar inrelbawlnaah sor­kar laipui chu inrawlh a, hmanrua atana Lieutenant Governor hmang ṭhinah a puh.