Dik lo taka contract pe chhuakah Maha minister puh

Maharashtra Educa­tion Minister Vinod Tawde chu dik lo taka con­tract pe chhuakah puh a ni. Hemi hma hian Maharashtra Rural Deve­lopment minister vek, Pan­kaja Munde-i chu dik lo taka contract pe a, cheng vaibelchhe 206 tihchingpennaa inhnam­hnawiha puh a lo ni tawh bawk.

Maharashtra School Edu­ca­tion Department chu e-ten­dering process zawm loin cheng vaibel­chhe 191 man contract pe chhuakah puh a ni a, he contract hi Education Minister Tawde chuan a lo tifel vek nia sawi a ni.

Dik lo taka contract pek chungchang hi Finance Department chuan chhui chiang turin a ti a, contract pawh hi tihtawp lailawk rih a ni.

Minister Tawde chuan an puhna chu thu dik lo a nih thu a sawi thung a, Finance Depart­ment-in harsatna a siam avangin a hma aṭangin contract pek tawh pawh chu tihtawp a ni tawh tiin a sawi a, sorkar sum dik lo taka hmanna a awm lo thu a sawi.

Contract pek chhuah hi Maharashtra state chhunga zila parishad school 62,105 tana fire extinguisher pekna tur a ni. School tinte hi fire extinguisher pathum ṭheuh dawng tura tih niin, pakhat hi cheng 8,321 mana chhut a ni.

Kumin February 27 khan School Education Department Director Mahavir Mane chuan Thane-a hmunpui nei, Reliable Fire Engineers hnenah contract hi a pe a, hei hi education minister pawhin a pawmpui a ni. Mahse contract tihfel dawn hian Finance Department aṭangin pawmpuina engmah lak a ni lo.