
Chhattisgarh-ah khawtual mi 2 Naxal helpawl ten that
Chhattisgarh-a Bijapur district huam chhunga Budigicheru thingtlang khuaah Maoists hel pawl chuan tribal mi, thingtlang mi pahnih an that. He pawikhawihna hi Raipur chhimlam aṭanga km 400 vela hlaa thleng niin police-ten an tarlang.
Pawikhawihna hi Thawhṭanni zan leh Thawhlehni zing inkara thleng niin, nunna chan pahnihte hi Maoist hel ten hmanrua hriam hmanga an beih vang niin an tarlang.
Thi zinga pakhat zawk hi sorkarin hela a puan, CPI(Maoist) hruaitu zinga mi nia tarlan a ni a, mahse chanchin kimchang erawh hriat a la ni lo tih Bijapur district police hotu Jitendra Yadav chuan a tarlang. An mi thahte hi police hnena helpawl chungchang thlen ṭhintu an nih vangin helpawl hian an bitum nia rin a ni bawk.
Pawikhawihna thleng hi police lam chuan chhui chiang nghalin, panchayat inthlan lo awm turah mipuite thinlunga hlauhna tuh an tumna vang a nih rin a ni bawk.
Kumin kumtir lamah khan Naxal hel pawl hian CPI(Maoist) thuruk ti putrutua puhin kum 41 mi, Bijapur district-a cheng an lo that tawh bawk. Hei bakah January 16 vek khan kum 48 mi Mirtur chu thah a lo ni tawh bawk a ni.
Police lam tarlan danin nikum chhung khan Naxal pawikhawihna vang hian Bastar huam chhung leh district dang pasarihah tualchhung mi 68 thi an awm.