
Gujarat-in UCC zir chiang tur committee din
Gujarat-a BJP sorkar chuan Uniform Civil Code(UCC) hman a nih theihna tur leh kaihhruainate zirchianga ngaihtuahtu tur committe a din. Supreme Court judge chawl tawh Ranjana Desai-a'n a kaihruai ang.
Committee thar dinah hian member panga awmin, UCC chungchanga an thil zirchhuah leh hmuhchhuahte chu ni 45 chhung ngeia sorkara thehlut tura tih a n nih thu Gujarat chief minister Bhupendra Patel chuan nimin Thawhlehni khan a sawi. "Uniform Civil Code chu hman mamawhna a awm em tih te zirchiang tur leh ruahmanna te siam a ngaihtuahna nei tur hian SC judge chawl ta kaihhruainaa committee hi din a ni, " tiin a sawi.
Gujarat home minister Harsh Sanghavi chuan state sorkarin UCC a hman dawn leh dawn loh chungchangah, zirchianna neihte an dawn hnuah thutlukna siam a ni dawn tih a tarlang. State sorkar hian a hmang a nih chuan Uttarakhand dawta UCC hmang tur state pahnihna a ni ang.
Uttarakhand state hi ramchhunga UCC hmang hmasa ber niin, BJP rorelna state zingah hmasa ber a ni. Uttarakhand huam chhunga cheng zawng zawngte huam tura tih ni mah se Schedules tribe leh hnam hnuaihnung venhim ngai bikte erawh huam tir an ni ve lo thung.