India ramah hri kai dam leh Nuai 41 chuang awm tawh

India ramah hri kai an pun nasat rualin enkawl dam pawh an tam tawh a, nimina sorkar report tihchhuah thlengah chuan hri kai tawh zingah dam leh nuai 41 chuang an awm tawh. Hri kai nuai 52 chuang an awm thung a, mi 84k chuangin hripui an thihpui tawh laiin hri kai mek nuai 10 chuang an awm tawh bawk. 

Maharashtra-ah chu state/ UT zinga hri kai tam berna niin hri kai an tam fal hle a, hri kai tam ber dawttu state Andhra Pradesh-ah chuan nimin report tihchhuah hnu aṭang khan hri kai nuai ruk chuang an awm tawh a ni.

Ministry of Health and Family Welfare-in nimina report a tihchhuahah chuan Ningani khan Covid-19 kai hmuh chhuah thar mi 96,424 an awm leh a, ni thum chhung chu a zawnin hri kai hmuh chhuah thar sing kua chuang an awm leh tawh a, nimin piah lam report nena khaikhin erawh chuan niminah hian hmuh chhuah thar an tlahniam hret.

Darkar 24 chhungin dama puan mi 87,472 lai an awm leh a, mi 1,174 an thi leh bawk. Nimina report tihchhuah thleng khan hri kai hmuh chhuah mi 52,14,677 an awm tawh a, chung zinga 41,12,551 chu dam leh tawhin  84,372-in an thihpui tawh a, 10,17,754 chuan hri an la kai mek a ni. 

Rajya Sabha-a BJP MP Ashok Gasti chu Ningani zan khan Covid-19 vangin a thi. 

Karnataka MP, kum 55 mi Ashok Gasti hi September 2-a hri a kai tih hriat a nih hnuah  Manipal Hospital-ah enkawl a ni. Hospital chuan damdawi-ina dah luh a nih hian Gasti hi a dinhmun a ṭha tawh lo hle tih sawiin, ICU-ah dah nghal a ni tih an sawi. 

Doctor-ten theihtawp an chhuah chungin an chhan thei ta lo a, Ningani zan dar 10.31 khan a thi tih hospital director Manish Rai chuan a sawi. 

Khawvel ram hrang hrang zinga hri kai tam ber dawttu India-ah hian hri kai tamna ber US aiin hri kai nuai 16.5 velin an la tlem a, US hi India hian a hnaih hret hret zel a ni.

Enkawl dam tawh rate chu 78.86% a ni a, hri kai mek rate chu 19.52% niin thihpui rate chu 1.62% a ni thung.

Indian Council of Medical Research (ICMR) chuan Ningani khan sample 10,06,615 an endik leh tih nimina report an tihchhuahah an tarlang a, hri len ṭantirh aṭanga nimin thleng khan sample 6,15,72,343 an endik tawh.

ICMR hian sample endikna tura labo­ratory pawmpui 1,764 an nei tawh a, chung zinga 1,060 chu sorkar laboratory niin 704 chu private laboratory a ni thung.