Union cabinet minister a bang

Union cabinet minister of food processing industries, Harsimrat Kaur Badal chu Lok Sabha-a agriculture bill pathum pass tak duh lohna lantirin union minister a nihna aṭangin Ningani khan a bang. 

Harsimrat Kaur Badal hi BJP thawhpui hlun  ber, Shiromani Akali Dal (SAD) party member a ni. SAD party chuan agriculture kaihhnawih bill pathumte hi ramchhunga loneitute rawn hmasak a nih hma loh chuan pass lo turin sorkar laipui chu a hmain an ngen tawh a,  an ngenna hi a hlawhtling lo a nih chuan Harsimrat Kaur Badal hi union minister a nihna aṭanga a ban tur thu pawh an lo sawi lawk tawh a ni. 

Lok Sabha-ah bill pathum hi pass luih a nih tak avangin SAD minister hian banna a thehlut nghal a, a banna hi prime minister Narendra Modi thurawn angin presient Ram Nath Kovind chuan nimin khan a pawm sak tawh bawk. 

Agriculture kaihhnawih bill pathum The Farmers Produce Trade and Commerce (Promotion and Facilitation) Ordinance, 2020, The Farmers (Empowerment and Protection) Agreement leh The Essential Commodities (Amendment) Ordinance, 2020 hi a bikin Punjab leh Haryana-a loneitute chuan an duh lo hle a, hei vang hian anmahni rawn hmasa turin SAD party chuan sorkar laipui an phut a ni. 

SAD party hotu Sukhbir Singh Badal chuan Ningani vek khan a nupui Harsimrat a ban tak avang leh an party ngenna an ngaihpawimawh loh vangin an party chuan BJP kaihhruai NDA an la thawhpui zel dawn em tih chu an ngaihtuah tur thu a sawi.