Srinagar hmun ṭhenkhatah curfew hlip

Jammu and Kashmir state-a tual≠chhung buaina thleng mek avanga hun rei tak hmun tam takah curfew puan a nih hnuin, nimin khan Srinagar district chhunga hmun
ṭhenkhatah chuan boruakin ziaawm lam a pan avangin curfew hlih a ni.

July 9-a security force-te'n Hizbul Mujahideen commander Buhran Wani an kahhlum avangin Kashmir Valley-ah hian buaina a chhuak a, buaina chhuak vang hian ni 46 chhung chu curfew leh mipui punkhawm khapna dante hman a ni tawh.

Nimi khan Srinagar district hmun tam zawkah curfew hi hlih a ni a, mahse khawpui chuan hnuai lama police station area panga bakah Batamaloo, Masuma leh Kralkhud area-ahte chuan curfew hi puan chhunzawm a la ni. Kashmir chhim lama Anantnag khuaah pawh curfew puan a ni bawk.

Kashmir Valley-a buaina thleng vang hian mi 65 in nunna an chan tawh a ni. Mipui thinrimte hian security force-te chu lungin an tawng ṭhin a, mipui thinrim pungkhawm hnawhdarhna atana sipaiten pellet an kahchhuah vangin mi tam takin hliam an tuar bawk. Pellet kahchhuah hian mi tam tak an mit-ah a fuh a, mitdel phah tur pawh eng emaw zat an awm. Hei vang hian eptu pawl aiawhte pawhin mipui thinrim thunun nana sipaiten pellet an kahchhuah ṭhin chu khap turin sorkar laipuiah pawh an nawr mek a ni.

J&K-a eptu party hrang hrang aiawhte hian Prime Minister Narendra Modi hmuin, an state buaina chingfel tura Kashmir-a pawl hrang hrang aiawhte chu inbiakna neihpui dan kawng zawng turin an ngen. J&K Chief Minister Mehbooba Mufti-i pawhi an state buaina tawh mek chu inbiakna hmanga chinfel a ngai tih a sawi.

Union Home Minister Rajnath Singh chuan vawiin hian Jammu and Kashmir hi a tlawh dawn a, Home Secretary Rajiv Merishi-an a ṭawiawm ang.