Amar Singh-a'n RS member aṭanga banah vau

Samajawadi Party MP Amar Singh chuan an party hotu, Mulayam Singh Yadav-a thawhpui hnaivai te chu an party chhungah chuan hmusit leh diriam an ni fo tih sawiin, Rajya Sabha member a nihna aṭanga banna thehluhah a vau.

Amar Singh chuan RS member a nihna aṭanga ban chungchang hi Mulawyam a sawipui dawn a, hemi hnu hian Rajya Sabha chairman Hamid Ansari hnenah banna lehkha hi pek a tum tih a sawi.

Hun eng emaw chen Samajwadi Party a chhuahsan hnuah Amar Singh hi a kir leh a, mahse party hruaitu hlun tam tak chuan a kir leh chu an lawm lo hle a ni, a ti.

Rajya Sabha rorel inkhawm neihah pawh tlar hnung lamah party hruaitu dang Reoti Raman Singh leh Beni Pradad Verm-te nen an ṭhu ho a, hruaitu dang Naresh Agarwal-te chu a hmatawngah an ṭhu thung a ni, a ti. Hnathawh ṭhat lam aia mimal duhsakna a len tawh chuan politics-in a tawrh phah tih a sawi.

Party hruaitute chunga a lungawi loh thu hi Mulayam-a'n sawichhuak lo tura thurawn a pek avangin hun eng emaw chen alo ngawipui tawh tih a sawi bawk.

Amar Singh leh a thurualpui, Jaya Prada-te chu kum 2010, February thla khan SP aṭang hian hnawhchhuah a ni. Hemi hnu hian party thar, Rashtriya Lok Manch tih chu kum 2011 khan a din a, Uttar Pradesh-a 2012 asssemby inthlanah khan bial 403 zinga bial 360 ah candidate an siam a, mahse seat khat mah an la lo. Kum 2014, March thla khan Rashtriya Lok Dal party a zawm leh a, 2014 Lok Sabha inthlanpuiah khan Uttar Pradesh-a Fatehpur Sikri bialah a chuh a, tunhnaiah SP-ah hian a lut leh ta a ni.