India dodal zawnga chet nan kan ram kan phal lo : Myanmar

Myanmar sorkar chuan India dodal zawnga chetna atan a ram chu a phal lo tih a sawi.

He thu hi Myanmar ram tlawha zin, External Affairs Minister Sushma Swaraj-i hnenah Myanmar ram hruaituten an lo hrilh a ni.

Sushma Swaraj-i hian Thawhṭanni khan Myanmar ram hi tlawhin, Myan≠mar President U Htin Kyaw bakah State Counsellor leh Foreign Minister Aung San Suu Kyi-i te a kawm a, ram pahnihte inlaichinna chungchang bakah, ramri kaltlanga helpawl ṭhenkhatte chet ṭhin dan chungchangte a sawipui a ni.

Myanmar President U Htin chuan India chu an ram ṭhianṭha tak a ni tih sawiin, thawhdunna ṭha leh hlawk zawk an neih theih hun a nghakhlel hle tih a sawi.

Ministry of External Affairs (MEA) thupuangtu Vikas Swarup chuan, "Myan≠mar ram hruaitute chuan a ram chu India dodal zawnga chetna atan eng pawl mahin an hman an phal ngai dawn lo tih an sawi a ni" a ti.

Swaraj-i chuan Myanmar rama mipui thlan sorkar tharin an ram hmasawnna tura a hmalakna hrang hrangah India-in a puih theih dan turte a sawipui bawk. Ram pahnihte thawhdun theih dan hrang hrangte a sawipui a, a bikin power sector lama thawhdunna turte an sawi a ni. India hian Moreh-Tamu link kaltlangin Myanmar ramah hian 3MW electricity a supply mek a, hei pawh hi changtlung zawka kalpui theih a nih tur thu Swaraj-i chuan a sawi.