Pawngsual thubuaiah insawirem theih a ni lo : Supreme Court

Supreme Court chuan pawngsual thubuaiah insawi­rem theih a ni lo tiin, insawirem tum chu dan kalha thiltih leh hmei­chhe zahawmna pal­zutna a ni, a ti.

SC chuan court hniam zawkte chu pawngsual thubuai a nem zawnga ngaih­tuah lo turin a ti a, pawngsualtu leh a tuartu inkara insawirem tumna awm reng reng chu dan kalh tlat a ni, tiin a sawi. Hetianga insawi remna hi court-in kalpui a tum a nih chuan a tisual a ni, a ti.

Madras High Court-in pawngsualtua puh leh a pawngsualin inbiak­remna an neih avanga bail-a chhuah a rem­tih hnuah, he thu hi Su­preme Court chuan a sawi­chhuak a ni.

Madras High Court-a Justice P Devadass chuan pawngsual tawktu hma­­lam hun thlirin, a pawng­sualtu nen hian insawirem dan kawng zawng mai tura a hrilh avangin inhnialna pawh a chawk chhuak nasa hle. Pawng­sual tawktu hi kum tling lo a la ni a, amah khawihtu nena insawirem hi a duh lo thu a sawi.

Mi tam takin Madras High Court thutlukna hi an sawisel a, lawyer rualte chuan he thutlukna hi sut leh turin HC Chief Justice pawh an ngen tawh bawk. Hetihlai hian Tamil State Women's Commission chuan HC thutlukna siam dan hi ṭha a tih thu a sawi thung a, inbiakremna neih leh neih loh chungchang chu pawngsual tawktu thu a ni, a ti.