Sorkar IP add aṭangin Nehru-a chanchin khawih danglam
Prime Minister Narendra Modi-a'n Digital India campaign a hawn ni, nimin khan Prime Minister hlui Jawaharlal Nehru chanchin an ziahna, Wikipedia profile chu khawih danglam a ni. Nehru chanchin ziahna hi sorkar laipui hnuaia mi, National Informatics Centre (NIC) Internet Protocol (IP) address aṭanga khawih danglam a ni.
Nehru-a profile an khawih danglamah hian a pu chu Gangadhar Nehru niin Muslim a ni a, Ghiasuddin Ghazi tia sawi ṭhin a nih thu leh a hnuah Hindu-a inpe chauh a nih thu te, Nehru leh India rama Governor General hmasa ber Lord Mountbatten-a nupui inkawp dan te an ziak lang.
He thil thlengah hian Congress party chu a lungawi lo hle. Party thupuangtu Randeep Surjewala chuan, "Jawaharlal Nehru leh Motilal Nehru-te Wikipedia page chu khawih chingpen a ni. Thil pawi leh lungchhiat thlak tak mai chu he page khawih chingpenna hi NIC (National Informatics Centre) IP hmangtu computer aṭanga tih a nih hi a ni. PM Narendra Modi hian sorkar IP hmanga PM hlui leh Congress hruaitute Wikipedia page khawih a nih dan hi engtinge a sawifiah ang?" a ti. Congress party chuan he thil thleng hi sawifiah ngei turin PM an phut.
PM hluite chanchin ziah danglam hi Wikipedia empanelled editor-te chuan an siamṭha leh thuai a, a khawih danglamtu IP address pawh an tarlang a ni.