Democracy ram lian ber Democracy Index-ah tlahniam

Economic Inte­lligency Unit-in Nilainia Democracy Index 2019 a tihchhuah takah khan India chu point 6.9 hmuin 51-na a ni a, kum 2014-a Bharatiya Janata Party (BJP) sorkar hnu aṭangin a tlahniam sawt hle. 

He index-ah hian Nor­way chuan point 9.87 hmuin pakhatna a ni a, Iceland (9.58) leh Sweden (9.39) chu pahnihna leh pathumna an ni thung. North Korea(1.08) chu a mawngphahah a awm bawk. Khawvela demo­cracy ram 167-te chu he index hmang hian thlan a ni a, khawvela democracy ram ṭha ber thlanna ti te pawhin a sawi theih ang.

Kum 2018 index nena khaikhin chuan India hi a tawlh hnung hle a, point a score tlem ber ṭum a ni. Kum 2018 khan point 7.23 hmuin 41-na dinhmun a hauh thei a ni. Kumina index tihchhuahah hian India a tawlh hnun chhan nia an sawi chu, Citizenship Amendment Act (CAA) leh National Register of Citizens (NRC) dodalna lantir a nih avanga ram chhunga harsatna hrang hrang thleng vangte leh sorkar laipuiin Jammu & Kashmir special status Article 370 a hlih vangte a nih thu an sawi.

Mumal taka kum 2006 aṭanga index tihchhuah tawh zawng zawngah India chuan chawlhrualin point 5.44 hmu ang a ni. Kum 2014 khan point 7.91 hmuin 27-na a ni a, hei hi a san ber ṭum a ni bawk.