Scorpene submarine data a pût ru

Mumbai-a Scorpene submarine paruk siam mek data pawimawh, phek 22,000 zeta tam chu a p˚t ru a, Australia newspaper-in online-a hmuh theih turin a dahchhuak.

Data putru zinga phek 4457 chu tuichhung submarine awm dan chanchin, tui chunga a awm dan chungchang ziahna phek 4209, combat management system chanchin phek 4301, torpedo launch system leh specification ziahna phek 493, communication system chungchang ziahna phek 6841 leh a navigation sytem ziahna phek 2138 te a ni.

Mumbai-a Mazegaon dock-a siam mek, Scorpene submarine hi dollar tluklehdingawn 3.7 man vel niin, khawvela submarine changkang ber zinga ngaih a ni. Tui hnuaiah a thawm ri hi a zawih em avangin hmuh fuh mai pawh a harsa hle nia sawi a ni. Mahse data put ru aṭang hian he submarine nihna kimchang, thawm a pek chhuah dan leh a combat system kimchangte chu vantlang hmuh theihin a awm ta a ni.

Defence Minister Manhar Parrikar chuan data put chhan hi hack vang a ni thu a sawi a, Navy-te pawhin India ram pawn lam aṭangin a put ru niin an sawi. Navy Chief Admiral Sunil Lana chu thil thlen dan zirchiang tura hrilh a ni tawh bawk.

Online lama data tarchhuaktu, Australia newspaper chuan data put ruk hi kum 2011-a France rama thleng niin a sawi a, hetihlai hian he data put ru hi France nge India aṭanga an hmuh tih erawh sawichian a ni lo.

Mazegaon dock-ah hian French shipbuilder, DCNS nena inremna siam angin Indian submarine paruk tur hi siam mek a ni a, a hmasa ber chu kumin kumtawp lam hian hman theih tura beisei a ni. DCNS Group hian Australia hi dollar tluklehdingawn 38 hu inremna a siampui bawk a, mahse document tihchhuahah hian Australia tana submarine a design chanchin erawh a lang tel lo.

Scorpene Class Submarine

π Kum 2005, October thla khan India chuan Scorpene submarine paruk leina tur hian order a siam.

π Submarine man tur hi cheng tluklehdingawn 235.6 (dollar tluklehdingawn 3.7) vel tura chhut a ni.

π Diesel-electric attack submarine hi tuipuiah ni 50 chhung a awm thei.

π Scorpene hian diesel engine pahnih (1,250kW power ) leh electric motor (2,900kW power) a nei.

π Submarine hi rescue and safety system kimchang nena thuam a ni.

π Ton 1,600-a rit a ni.

π Scorpene submarine hi chi hnih - CM-2000 leh AM-2000 a awm.

π France, Brazil, Malaysia leh Chilea Navy-te chuan SSK Scorpene class attack submarine hi an hmang tawh a ni.