J&K-in Rs vbch 6,000 hloh tawh

Jammu and Kashmir-a hun rei tak tualchhung buaina thleng vangin nunphung a khaihlak nasa tawh hle a, buaina chhuak vanga sumdawnna leh industry-te sum hloh zawng zawng chu cheng vaibelchhe 6,000 a chuang tawh a ni.

Mipuite leh security force-te inkara buaina chhuak vangin ni 45 chhung chu curfew leh pun≠khawm khapna dante hman a ni tawh a, sumdawnna hmunte hawn mumal theih loin an la awm reng a ni.

Kashmir Traders and Manufacturers Federation president, Mohd Yasin Khan chuan buaina chhuak vang hian trade and industry sector bik chuan nitin cheng vaibelchhe 135 hloh zel ang an nih thu a sawi. Buaina chinfel dan chu zawn thuai a ngaih thu sawiin, buaina chhuak vanga nunna chan an awm chu a pawi leh zual hle tih a sawi.

Sumdawnna hrang hrangten tualchhung buaina thleng hi an tuar a, hotel-ahte khualzin thleng tur an awm lo a, carpet leh shawl siamchhuahte pawh Srinagar khawpuiah zawrh chhuah theih lohin an awm bawk. Tun anga sumdawnna lama harsatna an tawh phahna hi a la thleng ngai lo niin sumdawngte chuan an sawi.

Chief of Army Staff Gen Dalbir Singh chuan Kashmir Valley dinhmunte enfiahin Thawhlehni khan a tlawh a, Northern Army Commander Lt Gen DS Hooda leh Chinar Corps Commander Lt Gen Sa≠tish Dua-te'n an ṭawiawm.

Hetihlai hian sorkar laipui chuan Jammu and Kashmir-ah ṭhalai nuai 1.4 tan hna thawh tur remchang siamsak a tum. Heng mite hi skill deve≠lopment training te pek an nih bakah, police leh paramilitary force-ahte thun an ni ang.

Official-te chuan an state-ah ṭhalai, undergraduate nuai khatte chu cetral sponsored scheme Himayat hnuaiah kum nga chhungin training pek an ni dawn tih an sawi. Training an zawh hian hna pek vek an tiam a ni. Himayat scheme hi kalpui a nih aṭangin ṭhalai 60,000 te training pek an ni tawh. Hei bakah hian kum 2013 khan programme dang, Udaan chu kalpui ṭan a ni a,
ṭhalai 40,000 hnenah kum nga chhungin skill development training pek tum a ni. He scheme hnuaiah hian graduate leh post graduate 21,000 te chu training pek an ni tawh a, an zinga a tam zawk hian corporate sector-ah hna an hmu tawh a ni.

Sorkar laipui chuan J&K-a India Reserve Battalion din tharna atan ṭhalai 5,000 lak belh a tum a, heng zinga 60% chu state ramri bul district-a awmte tan dah a ni ang. Thla ruk chhungin paramilitary force hrang hrang atan J&K ṭhalai 1,300 lak an ni dawn bawk a, hei bakah hian nakkumah J&K Police hnuaia Special Police Officer tur 10,000 lak a ni bawk ang.