Gujarat-ah Congress MLA 44-te hrem

Gujarat Assembly rorel inkhawmah eptu pawl, Congress MLA-te chu state-a BJP sorkar chu Dalit mite chunga pawikhawihna thleng ṭhinah na taka sawisel a, rorel thei lo an au buai avangin hrem an ni.

Thawhlehnia House rorelnaah Dalit mite beih an nih chungchang, a bikin thla hmasaa Una khuaa bawng humhalhtu inti ten bawng thi vun lipa puha Dalit mi an sawisak chung≠changte chu Congress MLA-te hian an sawichhuak a ni. Hemi lai hian party worker-te chuan sorkar laka lungawi lohna lantir≠in Janakrosh rally an huaihawt bawk.

Congress party worker-ten rally an huaihawtnaa tel mi 400 dawn chu man an ni a, an zingah hian senior leader Shankersinh Vaghela, Bharatsinh Solanki, Shaktisinh Gohil, leh Rajya Sabha MP Madhusudan Mistry-te pawh an tel. Mahse reilote hnuah chhuah leh nghal an ni.

House-a an aubuai avangin Congress MLA 44 te chu chhuah tir an ni a, hemi ni hian rorelnaa an tel chhunzawm phalsak an ni lo. Congress member-te hi House laiah chhuak khawmin, BJP sorkar chu Dalit dodaltu sorkar tiin an puh a, minister-te ṭhutna lamah thil te an vawm bawk. Speaker-in a khapna an ngaih pawimawh loh avangin marshal-te chu House aṭanga hruai chhuak turin a ti a, ni khat atan a suspend zui ta a ni.