MCC bawhchhiat vangin AAP MLA lakah FIR thehlut

Delhi police-te chuan nimin Nilaini February 5, khan Delhi Assembly inthlan kaihhnawihah Aam Aadmi Party(AAP) MLA, Okhla bial candidate Amanatullah Khan lakah FIR an ziak lut.

Model Code of Conduct (MCC) bawhchhiaa puh Khan laka FIR an thehluhna hi Jamia Nagar Police station-ah niin, BNS Act-a section 223/3/5 leh Representation of the People Act-a section 126 tlawhchhanin thubuai hi ziah luh a ni. AAP MLA hian Thawhlehni zanlaia inthlan kaihhnawihah bungrua hrang hrang sticker-te a sem lai CCTV kaltlanga hmuh a nih vangin MCC-a bawhchhia tih tarlan a ni. Hemi chungchang hi chhui chhunzawm zel a la ni bawk.

Delhi Assembly Constituency 70-a inthlanna hi venhimna khauh tak hnuaiah nimin khan neih niin, inthlan hi zing dar 7 aṭanga tlailam dar 6 thleng neih a ni. February 8 hian vote tlate chhiar a ni ang.

Senior official-ten an tarlan danin, January 7 aṭanga inthlan campaign theih hun tawp, February 3 thleng khan MCC bawhchhiat vangin thubuai 1,076 an ziak lut tawh. Mi 34,250 chu dan hrang hrang bawhchhiat vang hian hren leh man tawk an awm bawk.

Delhi Assembly inthlan kaihhnawihah hian police-te chuan dan loa kawl, silai 469 leh a mu 513 an man bakah mi 491 chu Arms Act tlawhchhan hian an man tawh. Heng bakah hian dan loa kawl zu liter nuai 1.1 leh a neitu nia rin mi 1,381 an man tawh bawk. Ruihhlo kg 190.6-a rit Rs vbc 77.9 man hu an man bakah a neitu nia rin mi 177 leh silver kg 37.39-a rit,Rs vbc 11.36 hu an man tawh bawk a ni.